Mahatashtra Times: 07/01/2014
मुंबईसह राज्यातील प्रमुख शहरांमध्ये घरांचे तसेच मालमत्तांचे रजिस्ट्रेशन करण्यासाठी लागणारी प्रतीक्षा संपविण्याचा निर्णय राज्य सरकार घेणार आहे. सरकारी कार्यालयांत केले जाणारे घरांचे आणि मालमत्तांचे रजिस्ट्रेशन घरबसल्या ऑनलाइन करण्याची यंत्रणा राज्य सरकारने तयार केली आहे. घर भाड्याने देण्याचे किंवा घेण्याचे व्यवहारही ऑनलाइन पद्धतीने केले जाणार आहेत. ही यंत्रणा मे महिन्यापर्यंत सुरू होणार आहे.
मुंबई, ठाणे, पुणे, नाशिक, नवी मुंबई या शहरात घरे आणि मालमत्तांचे रजिस्ट्रेशन करण्यासाठी राज्य सरकारच्या मुंद्राक शुल्क आणि रजिस्ट्रेशनच्या कार्यालयात प्रतीक्षा करावी लागते. मुद्रांक घोटाळ्यानंतर राज्य सरकारने रजिस्ट्रेशन आणि मुद्रांक शुल्क स्वीकारण्याच्या पद्धतीत काही वर्षांपूर्वी बदल केला. मुद्रांक आणि रजिस्ट्रेशनचे कोणतेही बनावट दस्तावेज बनविले जावू नयेत, याची खबरदारी घेवून नवी यंत्रणा बसविण्यात आली आहे. मात्र शहरात घरांची आणि मालमत्तांची खरेदी-विक्री त्याचप्रमाणे जमिनींच्या खरेदी-विक्रीचे व्यवहार मोठ्या प्रमाणावर होत असल्याने सदर यंत्रणेवर ताण पडत आहे.
घरांचे आणि मालमत्तांच्या रजिस्ट्रेशनसाठी ऑनलाइन नोंदणी रजिस्ट्रेशन कार्यालयात करण्यात येते. त्यानुसार १३ मिनिटाला एक याप्रमाणे दिवसाला एका रजिस्ट्रेशन कार्यालयात ३० व्यवहारांची नोंदणी केली जाते. त्यामुळे प्रतीक्षा यादी वाढत जाते. त्यामुळे ज्या घरांच्या खरेदी-विक्रीच्या व्यवहाराच्या टायटलमध्ये स्पष्टता आहे, त्यांचे रजिस्ट्रेशन घरबसल्या ऑनलाइनवर करता येणार आहेत. रजिस्ट्रेशनचे ई-पेंमेट करता येईल. तसेच फोटो काढण्यासाठी कॅमेरा आणि अंगठ्याचे ठसे अशी व्यवस्था घरी असली पाहिजे. ज्यांच्याकडे ही व्यवस्था नाही, त्यांच्यासाठी शहरात अनेक ठिकाणी ई-रजिस्ट्रेशन कार्यालये उघडण्यात येणार आहेत. त्यासाठी एजन्सी नेमण्याचा विचारही सुरू आहे.
भाडे व्यवहारांची यंत्रणा दोन महिन्यांत
घर भाड्याने देणे किंवा घेणे असे व्यवहार तर या दोन महिन्यांत ऑनलाइन पद्धतीने होणार आहेत. तसेच सिडको, एमआयडीसी या संस्थांच्या जमिनीवरील व्यवहारांचे टायटल स्पष्ट असते. तसेच त्यांचे रजिस्ट्रेशनचे दर निश्चित आहेत. तेथील घर अथवा कार्यालयांचे खरेदी-विक्रीचे व्यवहार ऑनलाइन करता येणार आहेत. ज्या व्यवहारात कागदपत्रांचे स्पष्टता आहे, कागदपत्रांची छाननी करण्याची गरज नाही, अशा घरांचे किंवा मालमत्तांचे व्यवहार हे ऑनलाइन पद्धतीने करता येतील.
Leave a Comment